记得今年1月2号，我喺面子书度问唔知今年李克勤同埋趙增熹会唔会一起搞音乐会活动？多得幸运之神眷恋同埋天时地利人和配合，佢哋两位喺8月24号同埋25号喺我家乡，马来西亚云顶云星剧场开咗两场演唱会。我当然第一时间买票参于其中。现在同大家分享一啲趣事吖...
呢场演唱会好正。佢留咗一个美好的回忆俾我同我啲朋友。阿熹同歌手同埋啲乐手好夹、好有默契之余，佢哋啲团队精神都好强。基本上整个演唱会嘅流程好顺，好好睇！呢样嘢真係要俾个like大家：）除此之外，克勤啲歌经过精心嘅管弦乐编曲过后，俾我感觉係原来中文流行歌曲咁样玩法都得，唔会难听。最难得嘅係中西乐器crossover出嚟嘅嘢一啲都唔会有冲突，好顺，听到好舒服。完全将中文流行歌曲推上另外一个层次。真係好多谢呢一班背后嘅音乐人。你哋嘅创意同埋勇于尝试嘅精神同埋肯不停介绍啲新嘢俾大家认识係值得赞扬嘅。今次所介绍嘅新嘢係趙太生演奏嘅三弦琴同埋男高音3人组合Opus3。无你哋呢一班人坚持去做呢个音乐理念，根本好难体会到乜嘢叫做音乐无国界嘅真正意思，多谢！
话说演唱会当晚，有一位观众，佢叫Simon，佢想同克勤一齐合唱。克勤都无拒绝，佢请咗Simon上台。咁Simon就想同克勤合唱＜命运符号＞呢只歌，唔知得唔得。我听到后我都会同Simon有同样嘅犹豫，就係呢首歌已经有些年纪咗（1988）而且又唔係演唱会热门歌曲而且又唔係今晚被例入歌单嘅歌，得咩？后来克勤开玩笑一阵后，佢就好有信心话：＂你唱啦，阿熹会弹㗎啦，无问题嘅！＂咁Simon就好定咁开始唱，两句后，啲琴声就嚟啦。当时即刻掌声四起，就咁样呢一场演唱会就穿插咗呢一段小小嘅惊喜，好开心。唱完之后，克勤仲好認真话有一份礼物送俾呢位歌迷，全场人都好好奇係乜嘢礼物，点知克勤话：＂今晚我送咗一个美好嘅回忆俾你。＂跟住全场人大笑。睇住台上克勤同阿熹果种自然嘅交流，克勤100%放心同埋有信心将音乐部分全权交俾阿熹玩，佢哋之间嘅合作无间精神同埋默契喺我要俾个like佢哋。因为到目前为止，我喺大马睇其他歌手嘅演唱会，我感受唔到同样嘅感觉！唉...真係好开心同埋兴幸有机会参予呢个演唱会：）
当演唱会进行到75%时，克勤依然喺到唱歌、讲笑。讲吓讲吓，佢就转头望住阿熹并称呼佢为「童颜」总监并且顺便问埋佢：＂点解你四十几岁人总可以咁靓仔嘅？＂阿熹失神一下，都唔知要答佢乜嘢好。跟住克勤把握机会就邀请阿熹不如一起唱首歌吖。呢个时候，全场人（除咗个啲忙住去厕所嘅人之外）唔单止将注意力放响佢哋身上，连啲攝影哥哥都将架机影住佢哋；当阿熹听到这个邀请时，佢一直摇头，口中唸唸有词，我哋唔知佢讲乜因为佢冇对住个咪讲，跟住佢就好忙地东张西望，又好彩地俾佢喺佢嘅位嘅隔离揾到一条毛巾；之后佢就拿起条毛巾抹汗，抹吓抹吓、好巧妙地毛巾就遮咗大半个面、净係得番对眼同埋对眼镜面对观众。克勤睇到如此情形都唔忍心继续邀请，唯有放佢一马。咁多位「熹迷」，呢一幕係唔係好有趣啊？...
我开始睇李克勤演唱会係喺2007年。直到2012年，佢嘅个人演唱会总共举行咗3次。每一次都留低啲深刻印象俾大马啲歌迷。第一次，2007年：演唱会结束前夕，李克勤趁换完衫要开始唱歌时，佢豪无预期喺台下出现，当时都几近我同我朋友嘅位；当时开心之余就係得个傻笑，因为事情发生得太突然。之后就到安哥部分然后到完全结束。唔知係唔係大家太耐冇听偶像唱现场，我哋依然赖死唔走，继续喺度嗌、喺度呼叫偶像。阿熹同啲乐队已经执紧乐器。我同一位朋友等咗大约10几分钟，跟住决定放弃。就响我哋差唔多要到门口时，奇迹出现了。克勤出现喺台上。我哋好开心地冲返落去自己嘅位度。睇得出当时嘅佢心情波动得好犀利，除咗感激同埋感谢，唯一实际啲嘅方法就係唱歌以答谢啲歌迷...
但係问题就出现咗，因为准备好要唱嘅歌已经唱完咗，咁点算好？我都睇到阿熹好努力地揾曲谱。后来佢哋经过一轮商量后就决定有乜嘢曲就唱乜嘢歌或者是克勤想唱乜嘢歌，阿熹就弹乜嘢曲。感觉有啲似喺歌廊feel。其实我都唔係几记得佢唱咗几多首，但係印象深刻有红楼梦同埋破晓时分。虽然啲歌唔係唱晒成首，但係我哋都好为佢哋个份诚意同埋心意喝彩，试问有几多位音乐人同埋歌手会为观众表演一啲未曾准备过嘅嘢啊?再加上仲係人哋嘅收工时间。佢哋两位就好似係录音室度jam歌咁，依家谂返起，真係好正：）...
第二次係发生喺2008年。呢一次係我同朋友们受幸运之神眷顾，喺一个偶然嘅机会吓比较近距离睇到李克勤同埋阿熹。话说演唱会散后，我哋等到啲人潮散咗后，就慢慢行出会场。跟住我哋一班朋友就企喺会场岀边倾偈。倾吓倾吓，其中一位朋友就讲咗一句：＂趙增熹吖！＂因为我嘅位置係背住会场嘅，所以听完后即刻回转身。非常好好运，唔单止见到真人，佢仲係同我擦肩而过：）当时嘅佢身穿黑色长裤、黑色T-shirt加件黑色外套同埋背住一个guitar，往佢要去嘅地点前进。当时嘅我哋就如小歌迷般呆呆地望住佢嘅背影。一切好似发梦咁。当时我係度谂，头先个一位咁低调、有如邻家男孩般嘅人就係几个钟头前呈献咗一场好正嘅演唱会嘅音乐总监?答案当然係!!!因为唔係我一个人见到。真係发梦都估唔到，我哋一班朋友咁鬼好彩，感恩。回过神之后，我哋就离开会场往酒店方向行去。好巧合地，我哋经过李克勤开庆功宴嘅地方，所以又凑热闹喺度望吓、八卦吓。等咗一阵，就近距离咁见到克勤。呢一次对于我哋嚟讲就好似买六合彩中奖般，完全谂唔到大家咁好运喺一个唔驶人逼人嘅情形下见到自己欣赏嘅人，太开心啦。 ：D.....
今次就返番嚟2012年克勤嘅演唱会。今次要讲嘅就係安哥之后嘅事情。如常地演唱会完满结束，银幕上都出埋多谢同埋晚安嘅字，乐手都喺度执紧乐器，有好多人都离场咗。唔知点解，今次克勤啲死忠派哥迷又好巧合地坐喺同一个位置。我哋唔理三七二十一，依然喺度起势嗌安哥。可能真係我哋有幸运之神眷顾，2007年嘅奇迹再次发生。首先係鼓手哥哥帮手凑乐，跟住我睇到弹琴果位哥哥都出埋嚟。哗！我哋班死忠派哥迷直头係兴奋到暴。呢个时候台上台下有二乱。第一乱，啲走咗嘅观众又要返番转头，因为难得吖嘛；第二乱就係啲收咗工嘅乐手、和音又好专业出番嚟各就各位...
呢个时候我睇到阿熹好似唔知发生乜嘢事咁企喺度，跟住有一位仁兄（我唔知边个嚟）搭住佢两边膊头喺咁摇佢...终于阿熹回过神嚟，跟住佢就收拾心情行去佢嘅位。讲真，佢呢个动作係好重要㗎，因为无咗佢，佢后面班乐队就唔会开始，咁好可能我哋就会错过一次精彩嘅＂意外＂表演啦！呢一刻除咗兴奋之余，我不禁自问，究竟仲有冇其他歌手同埋啲乐队会好似佢哋咁，因为抵唔住歌迷热情嘅呼叫，而好好人地做多一段节目，而且仲係冇事先安排好嘅?...
克勤好真诚地同我哋讲多谢同埋好开心、好感动有我哋嘅支持。同样地，我喺度谂，台上被感动应该唔会只有一个人，我谂会係成队人。如果唔係，啲乐队唔会咁齐心咁一致喺短时间来准备好自己嚟作今次嘅＂意外＂表演。各位朋友，我哋俾个掌声佢哋吖。正经过后，克勤都会窒吓我哋㗎，佢话我哋延迟咗佢吃沙爹（一种大马出名嘅烧烤肉串）嘅时间。不过佢唔介意，难得聚会一次。后来佢唱多三首歌，大家越听越兴奋，如果可以嘅话，真係想果一刻就咁停住。最后克勤别有用心安排咗一首87年嘅「谁願分手」嚟作结束。哗，啲词简直係入肉，大家咁唔捨得，但係无奈地都係要＂分手＂。不过令我惊讶嘅係咁耐嘅歌，阿熹都有准备到，佢嘅准备功夫都做到好足够，够细心！!呢一次演唱会真係结束啦！坦白讲，当晚嘅表演真係令我心情好难平伏，因为太兴奋了...
其实每一次李克勤来到大马嘅演唱会同香港嘅原创版都会有少许唔同。最大分別係我哋唔会睇到成队管弦乐队喺个台度表演，因为有好多因素限制比如话场地大细吖、赞助商多唔多吖、观众出席率高唔高吖、啲飞卖得顺唔顺吖等等。当一个演唱会要喺咁多限制下仲要做到个管弦乐嘅效果出嚟仲要喺资源有限嘅情况下保留啲演唱会嘅精椊，正如花家姐话斋：＂真係一啲都唔简单吖!＂回顾返咁多年嘅演唱会，印证咗一句说话：台上三分钟，台下十年功。在此真心多谢呢位劳苦功高嘅音乐总监，趙增熹先生同埋佢lead嘅个队乐手。亦都多谢李克勤慧眼识英雄介绍咗呢位喺香港乐坛多年贡献嘅音乐人。冇佢哋合作嘅演出，我哋外地人唔会有机会睇到有质数嘅表演，辛苦你哋啦，多谢晒！期待你哋新嘅演出，继续支持！
By Hacken and Hei's Fans
